Koetjes

Oonzen agrarischen sector is nen belangrieken poot oonder de Nederlaandse economie. Tuinders en boeren zorgt veur ’n laand van welvaart. ’n Laand van melk en honning. Mar loat disse hardwearkende leu noe bienoa dagelijks met allerlei regeltjes en papierweark um de oaren wörn e slingerd. Zee bint ’t haasje en de koetjes bint de Zwarte Piet.
Dé grote slogan: STIKSTOFVRIE en KLIMAAT NEUTRAAL. Vergaderen, moties insturen, rapporten oaverleggen, zulfs protesteren met grof geschut op ’t Malieveld in Den Haag. ’t Is vechten teng’n de bierkaai. Ze wördt d’r hoorndol van. Mar loat oonze oaverheid noe ok nen groten stal met koetjes hebben! In dissen stal stoat pootloze beeste met naams as crimiNEELTJE, fl its-PÖÄLKE, bloas-PIEPKE en SNAPS 1, 2 en 3. Ze greuit allemoal as kool. Gin stankoaverlast, gin stikstofprobleem, gin geëmmer met stadse noabers as ze smons veur dag en dauw de weg opgoat. Mochen d’r problemen wean, dan bint die in rap tempo van toafel. De twee- en veerwielige, rood-wit-blauw gestreepte melksteulkes dee elken dag deur ’t laand snort, zorgt dat disse koetjes in de bene blieft. Van ’t veurjoar kreang’n ze d’r ’n kieske bie. Natuurluk ginnen Bertha 17 of Dieka 38, zoas bie boer Frans. Nee, ene met ’n naam van disse tied: Corona. En dat is mie in kotten tied toch ’n best melkkoetje ewönn! ’t Schient – en doar zal ok wa ne kern van woarheid in schoelen – da’w beajde soorten neudig hebt, van wat vuur kaante ie ’t ok bekiekt of beredeneert.
D’r is ’n groot verschil: bie’j ’n boer in ’n loopstal he’w melkkoetjes die ge’wt. Bie het CJIB in Leeuwarden he’w melkkoetjes die vangt…

Anny Lesscher-Schasfoort